ფერმერობა რომ ბიზნესია და მის ხელშესაწყობად ინფრასტრუქტურა და კვლაფიციური კონსულტაცია აუცილებელია, ამაზე საქართველოს სახელმწიფო 2015 წლიდან მსჯელობდა. ამ პერიოდს უკავშირდება შეთანხმება საინფორმაციო-საკონსულტაციო ცენტრების შექმნის თაობაზე. კონსულტანტების პერიოდული გადამზადებითა და კომპეტენციის ზრდის მიხედვით, მიღწეულია შედეგი, რომ დღეს მათ არა მხოლოდ მიმდინარე, ახალ პროექტებზე ინფორმაციის მისაღებად, არამედ კვალიფიციური პროფესიული კონსულტაციის გასაწევადაც მიმართავენ.
ანდრია ქიტესაშვილისთვის ეს არა მხოლოდ სამსახური, არამედ საყვარელი საქმეცაა. ფერმერებთან ურთიერთობის დროს იგრძნობა, რომ თითოეული გადადგმული ნაბიჯი უკეთესობისკენ სვლას გულისხმობს.
როგორი საქმეა კონსულტანტობა? რა საკითხებთან გიწევს ყველაზე ხშირად შეხება?
ძალიან საინტერესო საქმეს წარმოადგენს ექსტენცია, ძირითადად გვიწევს ინფორმაციის მიწოდება ფერმერებისთვის, როგორც სააგენტოს მიერ განხორციელებულ პროგრამებზე, ასევე სოფლის მეურნეობის მიმართულებით სხვადასხვა დარგობრივ საკითხებზე.
როგორ იგრძნობა ფერმერების ნდობა სახელმწიფო სამსახურის კონსულტანტებისა და მათი დარგობრივი კომპეტენციის მიმართ
ფერმერების მხრიდან დიდია მომართვიანობა, გამომდინარე იქდან რომ გვყავს კვალიფიციური თანამშრომლები, რომელთაც შეუძლიათ ამა თუ იმ დარგობრივი მიმართულებით ამომწურავი პასუხის გაცემა.
როდის მოგმართავენ ყველაზე ხშირად?
ყველაზე ხშირი მომართვიანობა ფერმერების მხრიდან შეინიშნება გაზაფხული/ზაფხულის პერიოდში, როდესაც აქტიურად მიმდინარეობს სამუშაოები და ასევე სხვადასხვა სახელმწიფო პროგრამის დაწყებისას.
სად გადის თქვენი უფლება-მოვალეობების ზღვარი?
ჩვენი სამსახური წარმოადგენს საინფორმაციო-საკონსულტაციო ცენტრს და გვევალება ფერმერებისთვის ექსტენციის გაწევა სოფლის მეურნეობის მიმართულებით.
რამხელა რეგიონულ მასშტაბს მოიცავს შენი საქმე?
ჩემი როგორც თანამშრომლის სამუშაო არეალი, მოიცავს გურჯაანის მუნიციპალიტეტს, თუმცა საინფორმაციო-საკონსულტაციო სამსახურები მუშაობენ მთელი ქვეყნის მასშტაბით, თითოეულ მუნიციპალიტეტში წარმოდგენილია თითო სამსახური.
ყველაზე რთული რომელი აგრო პროექტი იყო?
თითოეული აგრო პროექტი და პროგრამა სააგენტოს მხრიდან ისეა გაწერილი, რომ ნებისმიერმა ფერმერმა ან და მეწარმემ ადვილად შეძლოს მონაწილეობის მიღება.
ახალგაზრდები თუ არიან შენს გუნდში და ვისთან ერთად მუშაობ?
გვყავს როგორც ახალგაზრდა ისე გამოცდილი აგრონომები, მექანიზატორები, ვეტერინარები და სხვა მიმართულების სპეციალისტები.
ფერმერების სამი მთავარი საჭიროება რა არის დღეს?
ინფორმაცია თანამედროვე ტექნოლოგიების და მიდგომების შესახებ, თანამედროვე მექანიზაცია და ფინანსები.
რით ხასიათდება ფერმერობის ბიზნესი საქართველოში?
ძირითადი მიმართულებაა მრავალწლიანი და ერთწლიანი კულტურების წარმოება, მეცხოველეობა, მეფუტკრეობა და სხვა, თითოეული მათგანი წარმოადგენს მომგებიან ბიზნესს, რა თქმა უნდა თუ ფერმერს წინასწარ ექნება გათვლილი რისკები და საჭიროებები.
განათლებას რა როლი აქვს აგრო საქმეში?
ძირითად აქტივს აგროსექტორში წარმოადგენს ცოდნა, რომლის გარეშეც დასაწყისშივე მარცხისთვისაა განწირული ჩვენი ნებისმიერი წამოწყება.
ტექნოლოგიური მხარე როგორ ვითარდება აგრო საქმიანობაში და სად გვაქვს განვითარებულ ქვეყნებთან გათანაბრების საშუალება?
თანამედროვე ტექნოლოგიები, აქტიურად ინერგება ქართველი ფერმერების მიერ, სხვადასხვა სახელმწიფო ხელშემწყობმა პროგრამებმა ხელი შეუწყვეს ტექნიკის, სარწყავი სისტემის და თანამედროვე ტექნოლოგიების შემოტანას ჩვენს ქვეყანაში.
ევროკავშირში, შენი აზრით, აგრარული სფეროს რომელ ნაწარმს ან ტრადიციულ მემკვიდრეობას წარადგენს საქართველო?
საქართველოს როგორც სოფლის მეურნეობის მიმართულებით განვითარებულ ქვეყანას შეუძლია ევროკავშირის ბაზარს მიაწოდოს ქართული ღვინო და სხვა ალკოჰოლური სასმელები, ასევე ხილი, რძის ნაწარმი, თაფლი და სხვა.
როგორ ფიქრობ, რა არის სოფლის განვითარების კონსულტანტისთვის ზრდის მომდევნო ეტაპი?
სოფლის მეურნეობა მუდმივად ვითარდება, აქედან გამომდინარე საჭიროა ექსტენციონისტი ზრუნავდეს თანამედროვე მიდგომების გაცნობაზე, მიიღოს ახალ ახალი ცოდნა და გამოიყენოს პრაქტიკაში.
