ირაკლი ხოზრევანიძე ქვემო ქართლის რეგიონში ფერმერებთან საკონსულტაციო საქმეს უკვე ათი წელია ეწევა. ოჯახის პრაქტიკული საქმიანობის შემდეგ, აგრარული განათლებითა და საკონსულტაციო ცენტრების მიერ გამოცხადებულ კონკურსში წარმატებით გავლის შემდეგ სოფლის განვითარების სააგენტოს რეგიონული სამსახურის მთავარ სპეციალისტად დანიშნეს. მისი საქმე ფერმერობას უკავშირდება, თანაც ისეთ აქტიურ მხარეებში, როგორიცაა წალკა, დმანისი, ბოლნისი, გარდაბანი, თეთრიწყარო და მარნეული. ირაკლის კლიმატთან ადაპტირებული მეცხოველეობის პროგრამის ფარგლებში, ტრენინგზე შევხვდი, როდესაც ის ფერმერებს კლიმატგონივრულ გადაწყვეტილებებზე ესაუბრებოდა. მისთვის ეს საკითხები არც ახალია და შეიძლება ითქვას, საქმიანობის ყოველდღიურ არეალში თავისუფლად ჯდება. მითხრა, რომ ფერმერების დახმარება წარმატებული პროექტებით გვირგვინდება და თავადაც შეუძლია გაიხსენოს, რამდენიმე საქმე, რომელიც სხვა თუ არაფერი, სწორი გადაწყვეტილებებით წარმატებულ ფორმამდე მივიდა, ახლაც მიმდინარეობს და შესაძლებელია განვითარდეს უკეთესი, უფრო მდგრადი შემოსავლის მისაღებად.
რომელი რეგიონში მუშაობთ და რით არის ის გამორჩეული აგრარული კუთხით?
რეგიონი ქვემო ქართლია, ქვემო ქართლში ექვსი მუნიციპალიტეტი, დმანისი, ბოლნისი, გარდაბანი, თეთრიწყარო, წალკა და მარნეული. ზოგადად, ჩვენი სამსახურის სპეციფიკიდან გამომდინარე, ფერმერები მიმართულებებად დაყოფილი არ გვაქვს, არც აქცენტი გვაქვს აღებული. სოფლის მეურნეობაში დაკავებულ ყველა ტიპის ფერმერთან გვაქვს ურთიერთობა მათი მომართვიანობიდან გამომდინარე.
ფერმერებს ტექნიკური დახმარება სჭირდებათ, ხშირად მოგვმართავენ ვეტერინარის არარსებობის გამო. რეგიონში კერძო ვეტერინარების სიმცირეა, რის გამოც გარკვეულ ღონისძიებებზე ეფექტური დახმარება ვერ ვლინდება. ამიტომ გვირეკავენ ჩვენ, გვიწევს მისვლა, ფერმერთან უშუალო დახმარება და სხვადასხვა ღონისძიებების ჩატარება. ეს ალბათ იმიტომ ხდება, რომ ვეტერინარებთან სისტემატური კონტაქტი ფერმერებს იშვიათად აქვთ და როდესაც გადაუდებელი საჭიროებაა, მაშინ ცდილობენ დაკავშირებას.
თქვენ რა საკითხებით გირეკავენ ხოლმე ყველაზე ხშირად?
ჩვენ მაინც ცნობილები ვართ, როგორც პროექტების განმახორციელებელი და ხელშემწყობი ორგანიზაცია. ჩვენი სამსახური ეხმარება ფერმერებს სახელმწიფო პროგრამებში მონაწილეობის მიღებასა და ამ პროცესის ტექნიკურ უზრუნველყოფაში.
უშუალო საქმიანობაში გადანაწილებული ვართ დარგობრივი მიმართულებებით, მაგალითად აგრონომები, რომლებიც საკმაოდ კვალიფიციურები არიან. სხვადასხვა ზოოტექნიკური მიმართულებებიც იფარება ჩვენი მხრიდან, სპეციალისტები ველზე გადიან, ფერმერების მომართვიანობიდან გამომდინარე და საჭიროების მიხედვით ეცნობიან ველზე არსებულ პრობლემას, ესაუბრებიან ფერმერებს სამომავლო, მეურნეობის განვითარებაზე.
ახალგაზრდები მაქსიმალურად ჩართულები არიან ამ მიმართულებებში. ცოტა ხნის წინ სპეციალისტების რაღაც კონტინგენტი ჩვენგან გავიდა და ფაქტობრივად სულ ახალგაზრდებით ჩანაცვლდა. ისინი ერთვებიან აგრარული საკითხების აქტივობებში.
თავად როგორ მოხვედი ამ საქმეში?
ჩემს ოჯახს 90-იანებიდან ჰქონდა მცირე მეურნეობა. ფაქტობრივად თითოეული ეტაპი გავიარეთ. მეურნეობა, როგორც მეცხოველეობა, ისე მარცვლეულის წარმოება; ამასობაში მოგვისწრო ამ მიმართულებების საექსტენციო საქმემ და გადავწყვიტე მონაწილეობა მიმეღო, ჩემი წვლილი შემეტანა აგრარული მიმართულების კონსულტაციით განვითარებაში.
როგორ ფიქრობ, ფერმერული ცოდნა რით ყალიბდება და როგორ გადადის ახალ, თანამედროვე ეტაპებზე?
Რა თქმა უნდა, ნებისმიერ ახალ ფერმერთან ახალი შეხვედრა, ახლის მომტანია. სულ სიახლეებთან გვიწევს შეჯახება. ამასთან ერთად, გამოწვევებიც საკმაოდ ბევრია. გამომდინარე კლიმატური ცვლილებებიდან, ყოველთვის ახალ-ახალი გამოწვევებია, სირთულეებიც ჩნდება და ასეთ დროს, მუშაობის და მსჯელობის შედეგად მივდივართ გამოსავლამდე, რომელიც ამ პრობლემას მოაგვარებს.
ყველაზე ხშირად ვინ გიხდის ხოლმე მადლობას?
ვისთანაც გვაქვს ურთიერთობა. ხშირად ვაძლევთ სწორ მიმართულებას და ხშირად მათი მცდელობა წარმატებით სრულდება. სწორედ ამიტომ გვიხდიან ხოლმე მადლობას.
ყველაზე დიდ მიღწევად რას თვლი ამ საქმიანობაში?
უამრავი ფერმერის და აგრარულ სფეროში დაინტერესებული ადამიანის გაცნობა მოვახერხე. კავშირები, რა თქმა უნდა, საგანმანათლებლო მიმართულებაც საინტერესო და წარმატებული იყო.
გახსოვს ისეთი საქმე, რომელიც წარმატებულად დასრულდა კონსულტაციის შემდეგ?
“დანერგე მომავალი” საკმაოდ წარმატებული იყო. წლებია მიმდინარეობს და გვაქვს რამდენიმე შემთხვევა, როდესაც ფერმერი მოვიდა კულტურის გასაშენებლად და ჩვენი პრაქტიკული გამოცდილებით შევთავაზეთ განსხვავებული კულტურა. ეს იყო გამოწვეული ნაკვეთის მდგომარეობის და ზონის მიერ. ჩვენი კონსულტაციით მიღებული ახალი მიზანი წარმატებული გამოდგა. სასიამოვნო იყო, რომ ჩვენი გამოცდილების ხარჯზე გაამართლა ახალმა არჩევანმა.
No comments:
Post a Comment